唔係好諗到送咩生日禮物畀 鵝王哲非 Cliffy（其實已經過咗生日一段時間lol），唯有打篇感謝文：
雖然有啲讀者唔知係真心誤會定搞笑抽水，好似以為我同Cliffy有曖昧關係，但其實Cliffy係我恩師。雖然我成日都會冇禮貌地寸佢同笑佢，但實際上我哋而家係師徒關係。
認識Cliffy係好多年前大家都作為喺Facebook活躍嘅圖文創作人，咁啱發現對方玩得之餘又啱傾，漸漸就熟絡咗。喺我人生好多低落同迷失嘅時刻，Cliffy都畀咗好多鼓勵同有用嘅建議我。雖然佢有時好似出言不遜嘅自大狂，又有時好似充滿攻擊性，但其實佢真係一個好溫柔又好努力嘅人，當然唔係話佢係嗰種無私大愛到乜人都幫到瞓晒身嘅聖人(?)，但至少只要你係肯虛心同想自救，又懂得感恩嘅話，佢就會好盡力幫你。我諗好多向佢求教過嘅人，都會感受到呢一點。
雖然我年紀已經唔細，但我係一個好唔成熟嘅人（所以英文先叫damnkidyk😂）。如果只係想保留自己童真嘅一面當然冇問題，但問題係我以前一直都唔知點先做到一個大人，心底對成長有畏懼。但Cliffy畀我睇到點樣可以成長做一個好嘅大人，例如點樣同過去嘅自己和解，點樣喺有限嘅資源下去做自己想做嘅事，點樣去吸收多方面知識然後加以運用，點樣喺自我懷疑嘅時候理清思緒，點樣察言觀色以學習待人接物，點樣堅持自己信念同時做到靈活變通，點樣對自己嘅家庭及同伴負責任⋯⋯當然，佢都唔係一個完美嘅大人，都會有缺點，但我喺佢身上真係學到好多，正因為見到佢嘅努力，我都多咗勇氣同信心去成長做一個我想成為嘅大人。
人生遇到咁嘅恩師真係我好大嘅福氣，好感激你一直以來嘅耐心同熱誠，衷心祝福你生日快樂，福如東海，壽比南山，事業成功，心廣體胖⋯⋯
Search